Jabur 126 (Mazmur 126)

Prajanjian Lawas

Pangarep-arep ing satengahing karubedan

¹Kidung jiyarah.
Ing kalane Pangeran Yehuwah mulihake kaanane Sion, kaanan kita kaya wong ngimpi. ²Ing nalika iku cangkem kita padha kebak guyu, lan ilat kita kebak giyak-giyak. Ing nalika iku ing antarane para bangsa ana ujar mangkene: “Pangeran Yehuwah wus nandukake prakara kang gedhe marang para wong iki!” ³Pangeran Yehuwah wus nandukake prakara kang gedhe marang kita, mulane kita padha bungah. ⁴Dhuh Yehuwah, Paduka mugi karsaa mulihaken kawontenan kawula, kados pulihipun lepen asat wonten ing Tanah Negeb! ⁵Wong kang padha nyebar wiji karo mbrebes mili, bakal ngeneni kambi giyak-giyak. ⁶Wong kang lumaku maju kalawan nangis kambi nyebar wiji, mulihe mesthi kalawan surak-surak karo ngusung gedhengane.