Jabur 103 (Mazmur 103)

Prajanjian Lawas

Heh nyawaku, saosa puji marang Pangeran Yehuwah

¹Anggitane Prabu Dawud.
Dhuh nyawaku, saosa puji marang Pangeran Yehuwah! Heh isining batinku kabeh, memujia marang asmane kang suci! ²Dhuh nyawaku, saosa puji marang Pangeran Yehuwah, lan aja lali marang sakehing kasaenane! ³Panjenengane kang ngapura sakehe kaluputanmu, lan maluyakake sakehe lelaramu. ⁴Kang ngentas uripmu saka ing kubur, lan makuthani kowe kalawan kadarman lan kawelasan, ⁵kang maregi kekarepanmu kalawan apa kang becik, temah kowe kaenomake maneh kaya manuk garudha. ⁶Pangeran Yehuwah paring adil lan kabeneran marang sakehing wong kang kinaniaya. ⁷Nabi Musa wus disumurupake marang margi-margine, lan pakaryan-pakaryane marang wong Israel. ⁸Pangeran Yehuwah iku ambek welasan lan ambek asih, gedhe sabare lan luber sih-susetyane; ⁹ora tansah ndedukani, anggone duka ora ing salawase. ¹⁰Kang katandukake marang kita ora timbang karo dosa kita, anggone paring piwales marang kita ora ing sabobote kaluputan kita, ¹¹nanging sapira dhuwure langit ngungkuli bumi, iya samono gedhene sih-kadarmane tumrap para kang ngabekti marang Panjenengane; ¹²sapira dohe wetan saka ing kulon, iya samono anggone nebihake panerak kita saka ing kita. ¹³Kayadene bapa anggone duwe piwelas marang anak-anake, iya kaya mangkono Yehuwah anggone paring piwelas marang para wong kang ngabekti marang Panjenengane. ¹⁴Amarga Panjenengane mirsa kadadean kita iku saka apa, sarta enget yen kita iki lebu. ¹⁵Anadene manungsa iku dina-dinane kaya suket, kaya kembang ing ara-ara, kaya mangkono anggone akembang; ¹⁶manawa kasiliran ing angin, banjur wus ora ana, tilas panggonane wus ora wanuh marang dheweke maneh. ¹⁷Nanging sih-susetyaning Pangeran Yehuwah, iku wiwit ing kalanggengan nganti tekan ing kalanggengan, tumrap para wong kang ngabekti marang Panjenengane, apadene kaadilane tumrap para anak-putune, ¹⁸tumrap para wong kang padha ngandhemi ing prasetyane lan kang eling marang dhawuhe, nedya diestokake. ¹⁹Pangeran Yehuwah wus nyantosakake dhampare ana ing swarga, sarta karajane mengku samubarang kabeh. ²⁰He para malaekate, para prawira prakosa kang nglakoni apa sadhawuhe, kalawan ngrungokake swaraning pangandikane, padha saosa puji marang Pangeran Yehuwah. ²¹He sakehing wadya-balane lan abdine kang nglakoni sakarsane, padha saosa puji marang Sang Yehuwah. ²²He sakehing yeyasane, ing sawewengkone pangwasane, padha saosa puji marang Sang Yehuwah! He nyawaku, saosa puji marang Sang Yehuwah.