Mustikaning Kidung 5

Prajanjian Lawas

¹Yayi, pengantenku, aku teka ing pakebonanku, ngumpulake mur lan anggi-anggiku, dakpangan tala lan maduku, dakombe anggur lan puwanku. Para mitra, mangana lan ngombea, ngombea nganti mendem tresna!

Kangene penganten putri

²Aku turu, nanging atiku melek. Rungokna, kekasihku thothok-thothok. “Wenganana kori, yayi, memanisku, manuk daraku, idham-idhamanku, amarga sirahku klebes ebun, lan rambutku kebak tetesing ebun bengi!” ³“Kawula sampun cucul rasukan, punapa kawula badhe dandan malih? Kawula sampun mijiki suku kawula, punapa badhe kawula damel reged malih?” ⁴Kekasihku nuli nglebetake astane metu bolonganing kori, atiku temah dheg-dhegan. ⁵Aku tangi ngwengani kori kekasihku, tanganku netesake mur, drijiku netesake mur cuwer, ing gocekaning kancingan lawang. ⁶Kekasihku dakwengani lawang, nanging kekasihku wis mengker, ngical. Kaya semaput-semaputa aku bareng Panjenengane ngical. Panjenengane daklari, nanging ora tinemu, dakaturi, nanging ora paring wangsulan. ⁷Wong rondha ing kutha bareng padha kepethuk aku, aku dipenthungi, ditatoni, rimongku direbut dening wong kang jaga balowarti. ⁸He, para putri ing Yerusalem, kowe padha daksupatani: manawa kowe kapethuk kekasihku, apa kang arep kokaturake marang Panjenengane? Aturna, yen aku nandhang brangta!

Penganten putri ngalembana penganten kakung ana ing ngarepe para putri ing Yerusalem

⁹– He wong sulistya ing satengahe para wanita, apa kaceke kekasihmu karo kekasih liyane, dene aku nganti koksupatani mangkene? ¹⁰– Kekasihku iku putih menthur lan abang sumringah, katon dhewe ana ing antarane wong puluhan ewon. ¹¹Mustakane kaya kancana, kancana murni, remane ngandhan-andhan, ireng kaya gagak. ¹²Tingale kaya manuk dara ana ing pinggir kali, siram ing puwan lan lenggah ana ing blumbang kang peres. ¹³Pangarasane kaya bedhengan anggi-anggi, godhag-godhaganing akar wangi. Lathine kaya bakung, kang netesake mur ajer. ¹⁴Astane giligan kancana, rinengga ing sesotya Tarsis, sarirane pindha gadhing ingukir, tinretes ing watu nilam. ¹⁵Sampeyane iku saka marmer putih, tumumpang ing dhasar kancana murni. Sarirane kadya gunung Libanon, pinilih kaya wit anjir. ¹⁶Pangandikane tuhu manis, sapari-polahe ngresepake, kaya mangkono iku kekasihku, iya kaya mangkono iku, he para putri ing Yerusalem!