Jabur 90 (Mazmur 90)

Prajanjian Lawas

Jilid IV: MASMUR 90--106

Gusti Allah, papan pangauban kang langgeng

¹Pandongane Nabi Musa, abdine Allah.
Dhuh Pangeran, Paduka punika dados pangungsen kawula turun-tumurun. ²Saderengipun redi-redi kalairaken, sarta saderengipun Paduka nitahaken bumi lan jagad, wiwit kalanggengan dumugi kalanggengan Paduka punika jumeneng Allah. ³Paduka mangsulaken manungsa dados lebu, lan dhawuh: “He para anaking manungsa, padha balia!” ⁴Amargi sewu taun punika wonten ing paningal Paduka, sami kados dinten wingi sasampunipun kapengker, inggih sami kados giliraning jagi ing wanci dalu. ⁵Manungsa Paduka kentiraken; sami kados ngimpi, kados tuwuhing rumput. ⁶Ing wanci enjing sekar saha seger tuwuhipun, sontenipun sampun lesah lajeng alum. ⁷Saestu, kawula sami sirna margi saking bebendu Paduka, saha kadhawahan giris awit saking bramantya Paduka. ⁸Kalepatan kawula sadaya Paduka beber wonten ing ngarsa Paduka, tuwin piawon kawula ingkang samar wonten ing padhanging cahyanipun wedana Paduka. ⁹Saestu dinten kawula sadaya sami mengker margi saking bendu Paduka, taun-taun kawula kawula telasaken kadosdene sesambat. ¹⁰Laminipun gesang kawula sadaya punika pitung dasa taun, dene manawi kawula sami kiyat, wolung dasa taun, saha ingkang dipun gung-gungaken punika anggenipun nandhang rekaos lan sangsara, amargi lampahipun rikat sanget saha kawula sami kabur sirna. ¹¹Sinten ingkang sumerep karosaning bebendu Paduka, saha ajrih dhateng anggen Paduka duka? ¹²Kawula mugi sami Paduka wulang ngetang dinten kawula ing saleresipun, supados sageda sami angsal manah ingkang wicaksana. ¹³Dhuh Yehuwah, Paduka mugi karsaa wangsul, – ngantos benjing punapa? – saha mugi karsaa melasi dhateng para abdi Paduka. ¹⁴Mugi ing wanci enjing kawula sami Paduka tuwuki ing sih-susetya Paduka temah kawula lajeng sami surak-surak lan bingah-bingah salami kawula gesang. ¹⁵Kawula mugi sami Paduka paringi kabingahan ingkang satimbang kaliyan dangunipun dinten-dinten anggen Paduka ngganjar karibedan, sarta satimbang kaliyan dangunipun taun-taun anggen kawula ngraosaken cilaka. ¹⁶Pakaryan Paduka mugi sageda tiningalan dening para abdi Paduka, saha kamulyan Paduka dening anak-anakipun. ¹⁷Kamirahaning Pangeran Allah kawula, mugi ngayomana kawula, saha Paduka mugi karsaa nyantosakaken pandameling tangan kawula sadaya, inggih pandameling tangan kawula sadaya punika mugi kasantosakna.