Jabur 75 (Mazmur 75)

Prajanjian Lawas

Gusti Allah, Hakim kang adil

¹Kanggo lurah pasindhen.
Miturut lagu: Aja ngrusak. Masmur anggitane Asaf. Kekidungan. ²Kawula sami ngunjukaken pamuji sokur dhumateng Paduka, dhuh Allah, kawula sami ngunjukaken pamuji sokur, tiyang-tiyang ingkang nyebut asma Paduka sami nyariyosaken pakaryan Paduka ingkang ngedab-edabi. ³“Manawa Ingsun nemtokake wektune, Ingsun piyambak kang bakal mancasi kalawan adil. ⁴Bumi lan sakehing wong saisine padha lebur; Ingsun, iya Ingsun piyambak kang njejegake cagak-cagake.” (Selah) ⁵Ingsun ngandika marang para wong gumunggung: “Sira aja padha gumunggung.” Sarta marang para wong duraka: “Sira aja padha masang sungu! ⁶Aja padha masang sungunira nganti dhuwur, lan aja calathu kalawan ndegeg!” ⁷Sabab kamulyan iku pinangkane ora saka ing wetan utawa saka ing kulon, lan iya ora saka ing pasamunan, ⁸nanging Gusti Allah iku kang jumeneng Hakim: nglorod wong kang siji, sarta njunjung sijine. ⁹Astane Pangeran nyepeng tuwung isi anggur kang munthuk, kebak campuran bumbu; Panjenengane banjur ngiling saka ing kono; lah ampase bakal disruput lan diombe dening sakehing wong duraka ing bumi. ¹⁰Nanging aku bakal surak-surak ing salawas-lawase, Gusti Allahe Rama Yakub bakal dakpuji kalawan masmur. ¹¹Sakehing sungune para wong duraka bakal diremuk, nanging sungune wong mursid iku bakal padha didhuwurake.