Jabur 129 (Mazmur 129)

Prajanjian Lawas

Luwar saka ing kasangsaran

¹Kidung jiyarah.
Banget anggonku wus dirupeki ing wong, wiwit nalika aku isih enom, – kareben Israel ngucap mangkono – ²banget anggonku wus dirupeki ing wong, wiwit nalika aku isih enom, ewadene padha ora bisa ngalahake aku. ³Wong mluku, mluku ana ing gegerku, alurane waluku didawakake. ⁴Pangeran Yehuwah iku adil, lan kang medhoti dhadhunge wong duraka. ⁵Sakehe wong kang sengit marang Sion bakal padha kawirangan lan bakal mundur. ⁶Padha kaya suket ing payon, kang alum sadurunge dibedhol, ⁷kang ora digegem dening tangane wong ngarit, utawa dirakupi dening kang mbenteli, ⁸satemah wong kang padha liwat ora ngucap: “Berkahe Sang Yehuwah anaa ing kowe kabeh! Aku padha mberkahi kowe kabeh ing asmane Sang Yehuwah!”