Jabur 122 (Mazmur 122)

Prajanjian Lawas

Pandonga nyuwunake tataraharjane kutha Yerusalem

¹Kidung jiyarah anggitane Prabu Dawud.
Aku bungah nalika ana wong kang kandha marang aku mangkene: “Ayo padha munggah menyang ing padalemaning Pangeran Yehuwah.” ²Saiki sikilku padha tumapak ana ing gapuramu, he Yerusalem. ³He Yerusalem, kang wus kaadegake dadi kutha sesanggitan rapet, ⁴kang kaunggahan dening para taler, yaiku para taler kagunganing Sang Yehuwah, prelu padha ngucap sokur marang asmaning Sang Yehuwah, nocogi pranatan tumrap Israel. ⁵Awit ing kono prenahe dhampar-dhamparing pangadilan, dhampare trahe Prabu Dawud. ⁶Yerusalem padha suwunna tentrem rahayu: “Sakehing wong kang tresna marang kowe ginanjara kasantosan. ⁷Tentrem rahayu anaa sajroning balowartimu, lan kasantosan anaa ing kadhatonmu.” ⁸Marga saka para sadulurku lan para mitraku, aku dakngucapake: “Tentrem rayahu anaa ing kowe.” ⁹Marga saka padalemane Pangeran Yehuwah, Gusti Allahku, aku bakal padha ngupaya apa kang becik tumrap kowe.